បន្ទាយមានជ័យ៖ រដ្ឋបាលខេត្តបន្ទាយមានជ័យហាមការដុតផាវនិងគ្រឿងផ្ទុះគ្រប់ប្រភេទ ក្នុងអំឡុងពិធីបុណ្យចូលឆ្នាំចិន-វៀតណាម ដើម្បីថែរក្សាសន្តិសុខសណ្តាប់ធ្នាប់សង្គម ក៏ដូចជាបង្កាអគ្គីភ័យជាយថាហេតុ និងទប់ស្កាត់អំពើចោរកម្មផ្សេង។
សេចក្តីណែនាំចុះថ្ងៃទី២៤ ខែមករា ឆ្នាំ២០២២ រដ្ឋបាលខេត្តបន្ទាយមានជ័យ បានជម្រាបដល់ម្ចាស់តូបឬហាងទាំងអស់មិនត្រូវនាំយកផាវយកមកលក់ដោយគ្មានការអនុញ្ញាតពីសមត្ថកិច្ចនោះទេ ក្នុងនោះក៏ណែនាំដល់អាណាព្យាបាលត្រូវហាមឃាត់កូនចៅកុំឱ្យទិញនិងដុតផាវលេងកំសាន្តជាដាច់ខាត។
រដ្ឋបាលខេត្តបញ្ជាក់ថា៖ «ស្នងការដ្ឋាននគរបាលខេត្ត-បញ្ជាការដ្ឋានកងរាជអាវុធហត្ថខេត្ត ត្រូវចាត់កំលាំងល្បាតត្រួតពិនិត្យរាល់សកម្មភាពល្មើសចាប់ពីទទួលសេចក្ដីណែនាំខាងលើនេះ ឱ្យបានម៉ឺងម៉ាត់បំផុត»។
ពិធីបុណ្យចូលឆ្នាំប្រពៃណីចិន-វៀតណាមនឹងចូលដល់នៅថ្ងៃទី៣១ ខែមករា ឆ្នាំ២០២២ខាងមុខ។ ប្រជាជនខ្មែរកាត់ចិន-វៀតណាមនៅកម្ពុជាបានរៀបចំពិធីសែនព្រេននានាដើម្បីអបអរពិធីបុណ្យនេះផងដែរ។
ក្នុងឱកាសនេះរដ្ឋបាលខេត្តបន្ទាយមានជ័យ ក៏បានជំរុញដល់ពលរដ្ឋឱ្យបង្កើនការប្រុងប្រយ័ត្ននៅពេលសែនព្រេនហើយត្រូវប្រាកដថាភ្លើងធូបទៀតរលត់អស់សិនមុននឹងចេញទៅធ្វើដំណើរកំសាន្ត៕